رمضان علي الطريقه الامريكيه

كل سنه و انتو طيبين يا جماعه...
زي كل سنه في رمضان ماما امريكا حضرتلنا حاجه جديده...
من سنتين كده كان زوربيا و من قبليها كان هاي فايف...
دلوقت في فايس بووك...
الاول كنت مش مقتنع بيه و بعد كده أبتديت اخش عليه و (أدعبس) ف الموقع بطريقتي...
اكتشفت أنه ظاهريا طريقه جديده عشان تعرف اخبار اصحابك و اصحاب صحابك...
لكن تحت الطبقه التخينه من الخداع و الضحك عالناس أكتشفت أنه طريقه جديده عشان الناس مخهم يفضل تافه و سطحي...
أيوه ممكن نقعد شويه كده نهيس عليه نص ساعه و لا حاجه كل يوم...
لكن ان الناس تخش عليه كل شويه دي اللي حاجه غريبه بصراحه...
و ان الناس ترفع حواجبها لفوق متر لو واحد قالهم : ايه فايس بوك دا ؟ دي حاجه أغرب...
و لما اقول لواحد بصراحه مش عاجبني الموقع أوي يعني يبص لي بقرف دي حاجه اغرب و أغرب....لكن ما علينا...
يعني دلوقت رمضان مليان بالطرق الامريكيه ال(عظيمه) عشان تسلي صيامك....
م س ن مسنجر, ياهو مسنجر...زوربيا, هاي فايف, فايس بوك,يو تيوب....
و طبعا مننساش الافلام الامريكاني اللي شغاله علي ودنه علي م ب سي 2....
يعني بصراحه الواحد مش محروم من حاجه...
سيبك بقي من الجزيره الوثائقيه اللي فيها برامج تزهق بالذات في رمضان...
و سيبك من الكتب بقي, بلا قرايه بلا وجع دماغ...
بصراحه أحب أشكر جميع المفكرين و مطورين البرامج الامريكان من نشر ثقافتهم المنيره علي أنحاء الانترنت...اللي هو من أختراعهم برضو...
و كل رمضان أمريكاني و انتم طيبون........ء

عندما تنزل المرأه تشتغل

معرفش تقلت عليكم و لا لأ بس المهم أني قلت اللي في نفسي....و البوست ده أخر بوست عن حوا و سنينها.....
الحاجه الوحديه اللي مناقشتهاش هي شغل الست و نزولها الشارع مع انه موضوع حمضان جدا و كل البشر أتكلمو فيه بس معلش بقي....اشمعني أنا!!
ساعات بتبقي في ستات لازم يعتمدو علي نفسهم عشان معهمش راجل....او ساعات بيبقو معاهم راجل بس...أحم, الفلوس مش قد كده...فيبنزلو يشتغلو....لكن للاسف في شريحه كبيره بتنزل عشان سبب غريب جدا:عاوزه احقق ذاتي !!
يعني أيه يعني ؟ فرضا ان انتي عندك موهبه في شغله معينه...ماشي يا ستي أنزلي اشتغلي و قدمي للمجتمع حاجه جديده...
لكن معندكيش اي شيء جديد بتنزلي ليه و تاخدي مكان شباب زي الورد قاعدين عالرصيف مش لاقيين تمن سوجاره كلوباترا !!
نوعيه البنات دول هتلاقيهم بكتره في طب و هندسه......
بياخدو اماكن رجاله في الكليتين دول و بيعلو مجاميعها عالفاضي...ممكن تقولي :ياعم يمكن شطار أديهم فرصتهم!!
او واحده من المحموقين من أجل حقوق المرأه تصرخ:انت رجعي و أمثالك لازم يبطلو يكتبو علي بلوجر!!
بقول للاتنين هدو اعصابكم و أسمعوني عشان مش فاضي للزعيق الفارغ ده.....
الدليل ان 95% من البنات اللي في هندسه مثلا لا يصلحو انهم يبقو مهندسات هو التالي:
هي اصلا متقدرش تشتغل في مجالها عشان هي اصلا مش مهتمه...هي دخلت عشان مجموعها...
السبب التاني أن نصهم عاوزين واحد يظبطهم و يرتبط بيهم و يتجوزو و يقعدو في البيت و توته توته فرغت الحدوته...
السبب التالت ان في بنات في انتاج و سيارات و باور شغلهم هيحتم عليهم أنهم يحتكو بطبقات بنت كذا و كذا و لازم تحوز علي أحترامهم ليها و الا مش هيسمعو أي حاجه من اللي هي بتقولو !!
ده الكلام ده عن هندسه بالذات, قول في طب ممكن...في دكاتره ستات كويسين كتير...
يعني خلاصه الكلام ان ساعات شغل الست بيكون رفاهيه لواحده نفسها تثبت أنها تقدر تعمل كده...
الكلام ده في جميع أنحاء العالم برضو...لما تلاقي ستات ملاكمات و قاعديم بيطحنو في بعض...
أو سواقين تاكسي مثلا معه أنها نادره بس بتحصل...
ادام انتي مكانك مش في مكان معين, ليه تخشيها و تاخدي مكان واحد محتاجها فعلا ؟
متهيالي انا خلصت موضوع المرأه و مش هكتب عنها بالعمق ده تاني......ء