جيفارا عالتي شيرت

الحقو يا ولاد زغردو يا حريم جيفارا أتعملو تي شيرت يا ولداه

اكيد كان في راجل حافي عبيط طلع يجري ف حواري الارجنتين-مسقط راس جيفارا- يزف النبأ لأهل المنطقه, ما اهو أكيد...تخيل مثلا انت اتعملك تي شيرت و حتي لا مؤاخذه اندر وير و كل العالم لبسه...مش يبقي أنجاز؟؟ بس للأسف هو حاجه تكسف مش أنجاز من ناحيتين...اول ناحيه: ان في دول العالم و في مصر معظم اللي لابسين جيفارا ميعرفوش عنه غير قليل قوي..ده لو عارفين حاجه اصلا خد عندك مثلا:
كنت قاعد مع واحد بقوله : حلو التي شيرت ده, بس هو مين الراجل أبو دقن ؟
قالي بكل فخر:ده جيفارا ازاي متعرفوش؟؟...قلتله طب متعرفني عليه, راح رد عليا :ده راجل عمل ثوره و مكانش بيهزر...قلتله ثوره ايه ؟ قالي و هو بيضحك يا عم انا ايش عرف أهلي...
خد موقف تاني : واحده حطه صورته عالديسبلاي بيك في المسنجر قلتلها تعرفي ايه عن الأشتراكيه أو الشيوعيه..قالتلي مش دي اللي عملوها في روسيا برضو ؟ قولتلها شكرااا
و قابل بقي...يعني مالاخر تحول رمز من رموز الثوره لحاجه حلوه كده الناس بتحب شكلها و طعمها زي الهامبورجر او الكاتشب..الله يرحمك يا جيفارا يا خويا...لو كنت عايش كان زمانك قلت ايه ؟ يلعن أبو اللي عاوز ثوره ؟ و لا هتشتري تي شيرت ليك أنت كمان بالمره؟
اما تاني ناحيه؟ ان العالم الغربيين ناصحين...بيمجدو رموزهم و في نفس الوقت بيسترزقو...أزاي ؟ جه واحد ايرلندي فنان أسمه جيم فيتزباتريك رسم جيفارا في الستينيات..الصوره اللي كلنا أكيد عارفينها و دي علي فكره اشهر صوره في التاريخ..البي بي سي هيا اللي قالت كده مش انا و الله...الصوره فوق اهي..بعد كده جت ناس حطتها علي تي شيرت و انتشرت في كل العالم..أنا بقي قريت
في مدونه أبن همام أن" المفروض الشباب ميمسكشي في رموز مشوهه و مش من ديننا"طبعا فيما معناه مش بالحرف,بغض النظر عن صحه الكلام ده أو خطاه انا عاوز أسال دي غلطه مين ؟؟حد يقولي يا جدعان..انا أقولوكو..دي غلطتنا أحنا, حد فكر يعمل صور لعبد الناصر ؟ او ياسر عرفات ؟ او صلاح الدين ؟ أو الفاجومي ؟ هما دول رموزنا بس محدش عاوز يفكر عشان الناس مخها في الحاجات دي محدوده..علي فكره محدش يفتكر أن جيفارا كان شكله جامد و روش و معدي كده...لأ...دي رؤيه فنان مسك الكاريزما اللي عند جيفارا اصلا و حطها تحت العدسه المكبره عشان كله ينبهر بيها بجد..و أراهن علي اي حاجه ان عندنا رموز لو فنان لعب شويه بفرشته هيخلي شكلهم جامد برضه..محدش يلوم الشباب انهم لابسين جيفارا عالتي شيرت...المشكله ان مافيش شخصيات عربيه اصيله علي الهدوم و لا حتي شخصيات مهلسه زي المغنيين...بس بيني و بينكو أنا لسه في انتظار تي شيرت صلاح الدين