ابليس زهقان

حد حاسس بأبليس اليومين دول ؟ انا حاسس انه بقي عاطل لا شغله و لا مشغله ...يا تري بيقضيها ازاي ؟ بيشيش عالقهوه و لا بيعط في شرم ؟ أكيد بتقولو ايه اللي انا بهري فيه ده...هقولوكو ليه انا بقول كده...اصل انا عندي نظريتين, الاولي: ان أبليس بقي بيشغل الناس بريموت كونترول من بعيد مبقاش بقي محتاج الاساليب القديمه بتاعت الوشوشه و اعمل كذا و كذا..دلوقت هو مخزنهم...يدوس واحد الواد يعاكس اتنين ميصليش تلاته يضرب فلوس من أهله و هكذا..اما التانيه انه مبقاش محتاج يعمل حاجه خلاص عشان الناس بقت متعووووده دايماااا...تيجي تلاحظ النظريه التانيه امتي بقي ؟ سامع واحد بيقول في رمضان..برافو عليك, في رمضان بقي تقدر تراقب و تلاحظ..هتلاقي واحده طالعه من التراويح و هوب العبايه اتقلعت جوه العربيه و الضحك اشتغل و لا عزاء للمؤمنين...او ممكن تلاقي شله شباب زي الورد خارجين من الصلاه رايحين عالقهوه يشربولهم حجرين و يتفرجو علي شويه كليبات في اللذيذ..ده غير بقي الوقت اللي بيضيع في التليفيزيون و الهلس, لا تقولي أبليس و لا عتريس..الراجل متكلبش و متسلسل و مش قادر يهرش يعني مين المسئول ؟ شوف انت بقي يا حبي
أنا متهيألي أبليس خدله أجازه حلوه كده بيريح فيها أعصابه و بحب اقوله مستنيينك يا شوشو تيجي تخربها الله يخرب بيتك ...