ا.م.ن د.و.ل.ه

طبعا كلنا عارفين التالي:

# الشعب المصري الغلبان مسحول في الشوارع...

# المدونين و الصحفيين و الاحرار متعذبين في المعتقلات و الاقسام...

# و المصري الغلبان كرامته بقت في-لا مؤاخذه يعني-الكابينيه....عارفينه ؟ أيوه البتاع اللي النظام بيحط الادمغه الرائعه و المفكره مع كرامه اصحابها جواه...

كل ده طبعا عارفين مين المسئول عنه...العادلي و زبانيه الجحيم و اللي مشغلهم...طبعا عن طريق أستخدام الجهاز الشيطاني اللي أسمه: امن الدوله...
كل البشر مصريين أو مش مصريين-و معاهم العبد لله - مستغربين ازاي الجهاز أسمه امن دوله ؟ مش المفروض يبقي اسمه هيئه تعذيب المواطنين...او اوضه الفيران الاشتراكيه..او شرطه العمليات الوسخه..انا نفسي كنت مستغرب لغايه اما في قعده صفا أكتشفت معني أمن دوله بعد تفكير طويل...دي اختصارات لأوامر النظام لرجالته يا جماعه !! يا خبر اسود..ازاي مخدناش بالنا من الموضوع ده ؟؟ حتي شوفو كده:

أ=أسجنوهم

م=موتوهم

ن=نيكوهم

د=دوخوهم

و=ولعوهم

ل=لبسوهم طرح

ه= أما الهاء الاخيره فمتهيألي دي ضحكه النظام: هع هع هااااع

من ناحيه السجن, فالسجون بقت مليانه مفهاش مكان حتي للصراصير..
و من ناحيه الموت فالشهداء قربو يوصلو لعدد شهداء أكتوبر..
اما عن-لامؤاخذه- النيك, فشغال علي ودنه في جميع اقسام و مخابيء و معتقلات النظام...
و عن التدويخ متهيألي لو الشعب شربله برميل خمره مش هيدوخ بالشكل ده...
أما التوليع في البني ادمين بالكامل الحمد لله طريقه لسه النظام ملجئلهاش....
الحمد لله طول ما مصر فيها رجاله جدعان و قلوبهم من نار, مش هتقدر يا نظام قذر تلبسنا طرح أبدا و لو عذبتنا لاخر العمر...
و متهيألي كلنا سمعنا ضحكه النظام عالشعب الاهبل...هاهاهاااع, و لا اجدعها معلم ماسك الشيشه في أيد و بيسكع مواطن علي قفاه بالايد التانيه ...
و بكده أقدر أقولكم ان احنا فكينا طلسم مصطلح امن دوله..ناقص نفك طلسم الشرطه في خدمه الشعب...لما افكها هبقي اقولوكو علي طول...

و لو حد فكها قبلي و النبي يبقي يقولي...