حواء تخرج من الشرنقه

لو سافرت الي دول العالم كلها....من استراليا الي جنوب افريقيا...
أو من مصر الي امريكا...أو حتي من فلسطين الي الصين هتلاقي ان المرأه هي المرأه و الرجل هو الرجل, قد تجد أختلاف في العادات أو التقاليد بس الجوهر هو هو....
لسه الست عاوزه حنان و حب, عاوزه تبقي دايما حلوه في عيون الناس ...عاوزه حد يضمها وهي خايفه...
و يحاسبها لما تغلط...يحسسها انها انثي بحق...
يعني من الاخر لو نفضنا للون البشره...
لو اتجاهلنا اللغات المختلفه اللي الستات بيرطنو بيها في كل حته....
لو نسينا انها لابسه حجاب أو كيمونو أو ميني جيب...
هنلاقي أنها حوا برضو بتاعت زمان بس بعد تغييرات رهيبه لدرجه انها بقت شكليا واحده تانيه خالص...
انا كنت هكتب في البوست ده عن الطريقه اللي حوا أتصرفت بيها في الحريه اللي جاتلها بس قبل كده قلت من الضروري اني اقول الحريه دي جت منين و أزاي...
و بحيث كده, خلوني اقولكم حوا في اوروبا و أمريكا كانت بتعمل أيه و اختها حوا العربيه كانت بتعمل ايه...
في سنه 1848 بدأت المرأه صراعها في أمريكا للتحرر من القيود التي كبلتها لفتره طويله جدا بعد ان كانت قوه مؤثره علي مر التاريخ زي ما ذكرت البوست اللي فات...
و هنا تري الفارق بين الامريكيه و المصريه او العربيه بشكل عام...
الامريكيه بدأت صراعا صعبا مع أقوي مخلوق في الكوكب: الرجل..
صراعا كان من الواضح فيه أن الانتصار صعب....
في حين المراه العربيه كانت لسه قاعده في بيتها بتحضر الميه عشان تغسل رجلين سي السيد...
و تصادف ان في نفس الوقت بدا عبيد امريكا الزنوج يتمردو و يحسوا انهم واقعين تحت ظلم رهيب...
يعني امريكا كان بيدور فيها حرب تحت نار هاديه ....
من ناحيه الستات عاوزين حقهم في التصويت و الانتخاب و حريه الراي و التعبير و خلافه...و من الناحيه التانيه العبيد كانو عاوزين يتعاملو زي البني أدمين...
النار دي خلت البلد تغلي لغايه الانفجار الكبير اللي محدش نسيه و لا هينساه...الحرب الاهليه الامريكيه...
و علي الرغم من كده ,في وسط طبول الحرب و نارها....استمرو الستات الامريكان في نضالهم...
و تم انعقاد أول مؤتمر لحقوق المراه في ولايه ماساشوستس الامريكيه...و دي كانت خطوه كبيره فعلا...كان هذا مؤشر كبير ان الستات مبيهزروش و عاوزين حقهم بجد...
و عدت السنين لغايه أما الحرب الاهليه خلصت سنه 1865
و المرأه كانت متوقعه أن الزنوج و الستات ياخدو حقهم تالت و متلت...
بس الصدمه جت في ان الرجال الزنوج أصبح لهم الحق في التصويت...و المرأه بلونيها الابيض و الاسود طلعت من المولد بلا حمص زي ما بيقولو...
الغريبه انهم لم يياسو و أستمرو في كفاحهم و بدون الدخول في تفاصيل ممكن اي حد يلاقيها في أي موقع عالنت,حصلت المرأه أخيرا- بعد كفاح أستمر 69 سنه - علي الحق في التصويت سنه 1917
و في أوروبا خطت المراه خطوات مشابهه و حصلت علي نفس الحق في التصويت بس للنساء فوق ال30 سنه و تم تعديل هذا القانون فيما بعد ليصبح من اول 21 سنه...
ممكن حد يقول و ليه كل الحرب دي ما كانت تريح دماغها و تنفض...
طبعا حوا كان ليها وجهه نظر...
فرضا ان في حاجات غلط في المجتمع و الرجل هو السبب فيها و راضي عنها...
مين هيصلحها ؟ ماهو مافيش غير الستات كده..... و عشان تتصلح لابد من تشريع قانون مره, و تعديل قانون مره تانيه...و هكذا...
بس عشان كل ده يتم لابد من تدخل المرأه في العمليه السياسيه و ده عمره ما هيكون بدون حصول المراه علي حقوقها الشرعيه في التصويت...حق التصويت سلاح قوي جدا في الدول الديموقراطيه ( اللي هي مش احنا طبعا)...يخليك تنجح ريس او تسقطه حتي...يخليك تغير المجتمع بحاله...
و اخيرا قدرت الست تخرج من الشرنقه لتصبح فراشه جميله تحلق في سماء الحريه مره أخري...
المره الجايه بقي هتكلم عن الستات العرب عملو ايه...نلتقي بعد الفاصل