جمهوريه أيجيبت العربيه

بغض النظر عن مكانه الواحد الاجتماعيه...سواء كان هاي كلاس و في بقه معلقه دهب او من الشعب المصري اللي طالع عين أبوه...ايه اللي يخلي الواحد ميتكلمش عربي او ميكتبش عربي ؟
مشكله في المخ مثلا زي الاشول كده يعني ؟ ..ولا مش قادر يكتب عربي...بيحس بالتخلف و الرجعيه؟
هل هي مشكله هويه و لا مشكله انتماء و لا ايه بالضبط ؟
أذا كنا مش قادرين نتكلم لغتنا الاصليه...البلد دي هتقوم لها قومه أزاي؟..طبعا نسبه اللي بيحبو يتكلمو أنجليش او يكتبو أنجليش مش كبيره اوي..بس في تزايد مستمر و كمان في تزايد مستمر في عدد المجلات الانجليزيه اللي بتخاطب الشباب...
طب يا جماعه ليه كده؟؟العربي عملكو ايه؟ ده أحنا نفتخر ان أحنا بنتكلم عربي...لغه القران الكريم
و طبعا موضه منتشره من زمان أن كل واحد يدخله كلمه انجليزي كده في وسط كلامه علي اساس انه يبين انه واد جامد و معدي...
حتي الكافيهات مبقتش بالعربي....عندك سيلانترو مكتوبه بالانجليزي بالبنط العريض...كوستا...وغيرهم كتير...طب ده علي اساس ايه؟ القهوه هتكلمني بالانجليزي و لا هلاقي ناس انجليز جوه؟
من ناحيه القهوه كلنا عارفين انها مبتكلمش..و بالنسبه للاجانب, دايما اما باجي اقعد في اي كافيه بلاقي90% من اللي قاعدين حواليا أجانب...
خد عندك بقي الحاجات الصغيره اللي في كل حته و بتفرسني:
1-زمان كان الواحد ينزل يشتري "شريط" عمرو الجديد, دلوقتي الاقي في الاعلانات: "البوم" الفنان (فلان) حاليا في الاسواق
2- لما الناس كانت بتسمي عيالها كانو بيسمو مني, رشا,ساره,ندي,مريم,ايناس,دينا...اما دلوقت بيسمو: ماري,شاهيناز,مارينا,باكينام....حتي الاسامي مبقتش عربي !!
3- عارفين عم عبده البقال اللي عالناصيه؟ مبقاش بقال...صحيح المحل مترين في متر بس جاب يافطه كبيره عليها أعلان بيبسي و مكتوب: "سوير ماركت" عبده...حتي عم عبده بقي روش و مبقاش بقال خلاص..
4-أما مجموعه من الناس فكرو يوصلو للشباب من 7 سنين تقريبا, عملو مجله أنجليزي قلبا و قالبا زي ما بيقولو و سموها تيين ستف , يعني حاجات شباب...و بعد كده بقي عملو مجله اسمها كلمتنا بالعربي, بس بدأو بأيييه؟
5- انا عارف ان في واحده صديقتي لو قرت الكلام ده هتقتلني بس هقوله كده كده: البلوجات اللي كلها بالانجليش و في بعضها بيتكلم عن البلد و مشاكلها ساعات!!!
تعالو بقي للعيال الصغيره في بعض المناطق زي المعادي مثلا.....
ياما و انا ماشي في المعادي الاقي عيال صغيره ماشيه بتكلم بعضها انجليزي و أبص عليهم اقول يمكن امريكان و لا حاجه..الاقيهم مصريين 100%...طب في ايه الحكايه مش عارف...حتي العيال الصغيره من اللي بيشوفوه في بيتهم أو في مدرستهم من تجاهل اللغه العربيه علمهم يتقربو من الانجليزي اكتر...
تقريبا زي ما سقراط و لا أفلاطون و لا حد من الفلاسفه دول قال: انا افكر اذا انا موجود, في بقي واحد مصري عبقري قال:انا اتكلم انجليزي...اذا انا جدع!!
انا مش ضد الانجليش, انا نفسي مش بسمع اغاني عربي و مش بتفرج علي افلام عربي بس ليا أسبابي...ده انا حتي في أول المدونه دي كنت بكتب بالانجليش...بس لسه من جوايا عربي و مصري في الصميم و عمري ما دخلت اي كلام وسط العربي من اي لغه...لأني عارف اني مش محتاج...
اللي بيحطو الانجليزي أو كلمات منه في وسط كلامهم ممكن يكونو ساعات ناس كويسه و دماغها حلوه...بس أنا عاوز اعرف ليه؟؟ ما انت بتعرف تتكلم عربي كويس..
طبعا في سبب لبعض الظواهر دي...ان حاليا التقدم العلمي و التكنولوجي -مش هقول الحضاري أكيد-عند الغرب, ففي ناس بتحاول تتمسح فيهم, ال يعني لو اتكلمو انجليزي شويه هتنزل عليهم البركه و هيبقو مثقفين...ممكن يكون رأيي صح أو غلط بس دي وجهه نظري علي كل حال...
سواء غلط او صح...سؤال بريء: احنا مش كفايه احتلينا فكريا و كمان هنحتل لغويا؟؟؟...مبقاش فاضل غير ان احنا نحتل عسكريا أن شاء الله..
خلي بالكو يا جماعه...بعد شويه هتلاقو ولادكو بيحيوا العلم بكل قوه:"تحيا جمهوريه أيجيبت العربيه!!"
ء