الامام الالي

زي ما كان في زمان العمده الالي لو كان حد فاكره...دلوقت الف مبروك يا جماعه بقي في امام ألي...
الإمام ده جهاز أسمه الرفيق ويتكون من سماعتين يحطهم المصلي في ودانه عند بدء الصلاة وبالضغط علي السماعة قبل تكبيرة الاحرام يتم اختيار عدد ركعات الفرض أو النافلة....
و من اراء الشيوخ في الكلام ده بيقول د. صبري عبد الرؤوف أن استخدام ما يسمى بالإمام الالكتروني بدعة لأنها لا تتماشى مع الخشوع والإخلاص لله حال الصلاه
أنا مش فاهم دلوقت , ايات ربنا بتتلي عليا في وداني....مش هبقي خاشع ليه يعني؟ ده حتي من غير السماعات دي و الواحد بيقرا لوحده ساعات في البيت صوت الدش بيبقي في ودانه....ابقي ساعات قاعد بصلي في أمان الله و صوت شيرين ملعلع من بعيد بس انا سامعه...حتي الجهاز ده لو الواحد علي صوته هيبقي مش سامع غيره و تركيزه هيزيد....يعني في أخلاص و كل حاجه...بدعه ايه ؟ هو لا سمح الله الجهاز ده غير حاجه في الدين ؟ لسه الصلاه فيها ركوع و سجود و خشوع و تشهد و فاتحه و زي ما هي....
دار الافتاء المصريه , و الشيخ علي جمعه وافقو علي الجهاز...بس مش عشان أستخدامه بدل جماعه المسجد أو الجمعه, لأ ده عشان الصلوات الفرديه..حيث ان شركه البرمجيات اللي ابتكرت الجهاز قالت أن الجهاز بيسمح للمصلي أنه يسمع عدد من الايات أكثر عددا و تنوعا....
يعني معظمنا بيقرا لما ييجي يصلي لوحده سور قصيره علي قد حفظه, الجهاز بقي يسمحلك انك تسمع من القرأن الكريم أكتر و ده من رأيي شيء كويس مش وحش, التكنولوجيا ساعات بيبقي ليها مزاياها, و دي ميزه جديده ليه منستخدمهاش؟
لكن أنا متأكد أن هتلاقي هجوم كاسح علي د. علي جمعه و اتهامه بزعزعه الاسلام في المجتمع و بلبله فكر المؤمنين و دعوه الي هجر المساجد و كلام بقي زي الدبش....
نفسي نتقدم فكريا و الله...و كفايه مهاترات فارغه